satua bali

Bukal Pesu Peteng

Wenten katuturang satua Bukal Pesu Peteng, kacerita mangkin ada bukal menyama ajak patpat, I Bukal ane wayanan, I Malong  ane nengahan, I lelawah ane nyomanan, I Jempihit ane ketutan. Sa dina-dina ia magonjakan, ngorahang sorohne paling melah digumine. Bagusne bungah buka bunga, sugihe meliah buka pasih, duege madugdug buka gunung, agunge tegeh buka langit, sitenge maguet buka batu, wanene maranen buka lelipi panteg.

            Sedekan iteh magonjakan ajak nyaman-nyamane, saget teka kelihan burone, badbad pesan kelian burone mamunyi, “ Jro Bukal!!!tiang mapengarah, benjang banjar burone sami tedun mekarya. Mara keto munyin kelian burone “ bangras I Bukal masaut “ ngudiang  icang bang arah-arah tedun ? ade kene buron makampid???, sawireh keto pesautne lantas kelian burone megedi. Kenehne jengah I kelian buron sawireh merasa kalah.  Malonge bengong, lelawahe dekah, jempihite ngejengit, Bukale kenel ingkel-ingkel, maan nguluk-uluk kelihan burone.

            Sedeng iteh mekedekan , saget teka kelian kedise tur alon-alon mamunyi “jro Bukal tiang mapengarah, benjang benjang banjar kedise tedun mekarya, sawireh keto biin I Bukal bangras mesaut” Ujang icang bang arah-arah ??? ade kene kedis megigi rangap-rangap???, mara keto pesautne I Bukal, prajani kelian kedise magedi. Ditu lantas  I Bukal Nyangetang kedek ngengkak tur mesuryak  ngorahang kelianne belog, ngaku soroh bukale paling ririha.

            Gelis cerita I Lutung muduhang burone makejang, disubane mapunduh lantas memunyi. Wihhhhhhh! Buron ajak mekejang jani jalan megae  depang bukale ngoyong. Lautang mekejang ginane soang-soang : ane ngamah be lautang meboros, ane ngamah umbi-umbian lautang ngelumbih, ane ngamah padang lautang ketegale, ane ngamah woh-wohan bareng ajak icang . mara keto pegrasah burone ngalaih amah mekejang.

            Kacerita mangkin banjar kedise leg liang maan ngunuh buah-buahan ade buah bunut ane nyangluh, buah juet ane manis mekejang banjar kedise merasa girang liu maan duman. Sedek iteh maduman saget teka I Bukal laut memunyi bangras tur getar Wihhhhh....iba soroh kedis ngudiang icang tusing bang duman? Icang patuh teken iba paturu mekampid, ditu lantas banjar kedise sebet sawireh I Bukal nagih duman.

            Keto masih banjar bojoge liang pesan liu pesan maan woh-wohan tasak-tasak lan manis-manis, ada buah kepundung,ceroring,poh,pakel,wani,manggis tur woh-wohan sane lianan. Saget teka I Bukal bareng nagih duman. Tur I Bukal ngomong! Wihhhhh.......Iba soroh bojog ngudiang icang tusing bang duman? Icang patuh teken iba, paturu magigi rangap “, mara keto gedeg burone makejang, lantas soroh  Bukale tundunge lan suudange mebanjar. Ditu lantas I Bukal jejeh tusing bani pesu lemah. Ento sawireh soroh bukale pesu peteng-peteng dogen tusing bani pesu lemah.

            Nah keto sampun yen anake lengit menyama braya digumine ten nyak segilik segulung sa bayan taka sinah lakar nemu sengsara.